ਤਲਵਾੜਾ ਤੋਂ ਜਲੰਧਰ ਕਨਵੈਨਸ਼ਨ ‘ਚ ਮਨਗਰੇਗਾ ਕਾਮੇ ਹੋਣਗੇ ਸ਼ਾਮਲ

ਤਲਵਾੜਾ: ਮਨਰੇਗਾ ਵਰਕਰਜ਼ ਯੂਨੀਅਨ ਪੰਜਾਬ ਵੱਲੋਂ 6 ਤਾਰੀਕ ਨੂੰ ਜਲੰਧਰ ਵਿਖੇ ਮਾਝਾ ਦੋਆਬਾ ਜ਼ੋਨ ਦੀ ਕੀਤੀ ਜਾ ਰਹੀ ਕਨਵੈਨਸ਼ਨ ਲਈ ਮਨਗਰੇਗਾ ਕਾਮਿਆਂ ’ਚ ਭਾਰੀ ਉਤਸ਼ਾਹ ਹੈ। ਦੇਸ਼ ਭਗਤ ਯਾਦਗਾਰ ਜਲੰਧਰ ਵਿਖੇ ਹੋਣ ਜਾ ਰਹੀ ਕਨਵੈਨਸ਼ਨ ਲਈ ਬਲਾਕ ਤਲਵਾੜਾ ਤੋਂ ਵੱਡੀ ਗਿਣਤੀ ਮਨਰੇਗਾ ਕਾਮੇ ਸ਼ਾਮਲ ਹੋਣਗੇ। ਇਹ ਜਾਣਕਾਰੀ ਅੱਜ ਇੱਥੇ ਮਨਰੇਗਾ ਵਰਕਰਜ਼ ਯੂਨੀਅਨ ਇਕਾਈ ਤਲਵਾੜਾ ਦੀ ਹੋਈ ਮੀਟਿੰਗ ਉਪਰੰਤ ਮੀਡੀਆ ਨਾਲ ਸਾਂਝੀ ਕਰਦਿਆਂ ਮਨਰੇਗਾ ਮੇਟ ਸੋਹਣ ਲਾਲ ਹਲੇਡ਼੍ਹ, ਦੌਲਤ ਰਾਮ, ਸਤਪਾਲ, ਸੁਰਜੀਤ ਕੌਰ ਆਦਿ ਨੇ ਦਿੱਤੀ।
ਆਗੂਆਂ ਨੇ ਦਸਿਆ ਕਿ ਮਨਰੇਗਾ ਮੇਟ ਅਤੇ ਵਰਕਰ ਪਿਛਲੇ ਲੰਮੇ ਸਮੇਂ ਤੋਂ ਆਪਣੀਆਂ ਮੰਗਾਂ ਦੀ ਪ੍ਰਾਪਤੀ ਲਈ ਆਪਣੀ ਪੱਧਰ ’ਤੇ ਸੰਘਰਸ਼ ਕਰ ਰਹੇ ਹਨ, ਪਰ ਹੁਣ ਮਨਰੇਗਾ ਵਰਕਰਾਂ ਦੇ ਸੰਘਰਸ਼ ਨੂੰ ਜਿੱਤ ਦੀ ਬਰੂਹਾਂ ਤੱਕ ਲਿਜਾਣ ਲਈ ਪੰਜਾਬ ਪੱਧਰ ‘ਤੇ ਜਥੇਬੰਦ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ। ਜਿਸ ਤਹਿਤ ਮਾਝਾ-ਦੋਆਬਾ ਜ਼ੋਨ ਦੀ ਪਹਿਲੀ ਕਨਵੈਨਸ਼ਨ ਜਲੰਧਰ ਵਿਖੇ, ਉਪਰੰਤ 11 ਜੁਲਾਈ ਨੂੰ ਬਠਿੰਡਾ ਅਤੇ 13 ਜੁਲਾਈ ਨੂੰ ਪਟਿਆਲਾ ਜ਼ੋਨ ਦੀ ਕਨਵੈਨਸ਼ਨਾਂ ਕਰਨ ਦਾ ਪ੍ਰੋਗਰਾਮ ਉਲੀਕਿਆ ਗਿਆ ਹੈ। ਜਲੰਧਰ ਕਨਵੈਨਸ਼ਨ ਲਈ ਤਲਵਾੜਾ ਤੋਂ ਵੱਡੀ ਗਿਣਤੀ ਮਨਰੇਗਾ ਕਾਮੇ ਸ਼ਾਮਲ ਹੋਣਗੇ। ਜਥੇਬੰਦੀ ਦੀ ਲਾਮਬੰਦੀ ਲਈ ਅੱਜ ਬਲਾਕ ਦੀ ਮੀਟਿੰਗ ਕਰਕੇ ਪਿੰਡ ਪੱਧਰ ‘ਤੇ ਮਨਰੇਗਾ ਵਰਕਰਾਂ ਨਾਲ ਸੰਪਰਕ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ।
ਹੋਰਨਾਂ ਤੋਂ ਇਲਾਵਾ ਇਸ ਮੌਕੇ ’ਤੇ ਸ਼ਿੰਦਰ ਪਾਲ ਰਜਵਾਲ, ਰਮਾਂ ਅਪਰ ਰਜਵਾਲ, ਅੰਜੂ ਸ਼ਰਮਾ, ਅਨੁਰਾਧਾ, ਜੋਤੀ ਰਾਣੀ, ਕਵਿਤਾ ਦੇਵੀ, ਨਿੱਕਾ ਰਾਮ ਆਦਿ ਵੱਡੀ ਗਿਣਤੀ ਮਨਰੇਗਾ ਮੇਟ/ ਵਰਕਰ ਹਾਜ਼ਰ ਸਨ।