ਅਜਨਾਲਾ: ਬੀਕੇਯੂ ਟਿਕੈਤ ਦੇ ਮੁੱਖ ਬੁਲਾਰੇ ਰਾਕੇਸ਼ ਟਿਕੈਤ ਅਤੇ ਬੀਕੇਯੂ ਲੱਖੋਵਾਲ ਦੇ ਸੂਬਾ ਪ੍ਰਧਾਨ ਹਰਿੰਦਰ ਸਿੰਘ ਲੱਖੋਵਾਲ, ਅਜਨਾਲਾ ਖੇਤਰ ਦੇ ਕਿਸਾਨਾਂ ਮਜ਼ਦੂਰਾਂ ਲਈ ਹੜ੍ਹ ਰਾਹਤ ਲੈ ਕੇ ਐੱਸਕੇਐੱਮ ਦੇ ਮਹਿਲ ਬੁਖ਼ਾਰੀ ਵਿਖੇ ਲੱਗੇ ਕੈਂਪ ਵਿੱਚ ਪਹੁੰਚੇ, ਜਿੱਥੇ ਉਨ੍ਹਾਂ ਕਿਸਾਨਾਂ ਦੇ ਬੀਜ ਤੇ ਖਾਦ ਵਾਸਤੇ ਯੂਪੀ ਦੇ ਕਿਸਾਨਾਂ ਦੀ ਤਰਫੋਂ ਦੋ ਲੱਖ ਰੁਪਏ ਦੀ ਪਹਿਲੀ ਖੇਪ ਅਤੇ ਮਜ਼ਦੂਰਾਂ ਲਈ ਰਾਸ਼ਨ ਦਾ ਇੱਕ ਟਰੱਕ ਅਜਨਾਲਾ ਖੇਤਰ ਲਈ ਭੇਟ ਕੀਤਾ।
ਇਸ ਸਮੇਂ ਰਾਕੇਸ਼ ਟਕੈਤ, ਹਰਿੰਦਰ ਸਿੰਘ ਲੱਖੋਵਾਲ, ਡਾਕਟਰ ਸਤਨਾਮ ਸਿੰਘ ਅਜਨਾਲਾ, ਜਤਿੰਦਰ ਸਿੰਘ ਛੀਨਾ, ਸੁੱਚਾ ਸਿੰਘ ਅਜਨਾਲਾ, ਧਨਵੰਤ ਸਿੰਘ ਖਤਰਾਏ ਕਲਾਂ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਇਹ ਰਾਹਤ ਪੰਜਾਬ ਦੀ ਦੂਜੇ ਸੂਬਿਆਂ ਲਈ ਭਾਈਚਾਰਕ ਸਾਂਝ ਦਾ ਸਬੂਤ ਹੈ। ਅੱਜ ਪੰਜਾਬ ਵਿੱਚ ਆਏ ਹੜ੍ਹਾਂ ਨੇ ਸਾਬਤ ਕੀਤਾ ਹੈ ਕਿ ਸਾਰੇ ਦੇਸ਼ ਦੇ ਲੋਕ ਪੰਜਾਬ ਨਾਲ ਪਿਆਰ ਕਰਦੇ ਹਨ ਤੇ ਇਸ ਦੁੱਖ ਦੀ ਘੜੀ ਵਿੱਚ ਪੰਜਾਬ ਨਾਲ ਖੜੇ ਹਨ। ਟਿਕੈਤ ਹੋਰਾਂ ਕਿਹਾ ਕਿ ਇਹ ਰਾਹਤ ਦੀ ਪਹਿਲੀ ਖੇਪ ਹੈ ਤੇ ਯੂ ਪੀ ਦੇ ਲੋਕ ਐਸ ਕੇ ਐਮ ਦੇ ਰਾਹੀਂ ਹੋਰ ਵੱਡੇ ਪੱਧਰ ਤੇ ਖਾਦ, ਬੀਜ ਤੇ ਡੀਜ਼ਲ ਲਈ ਸਹਾਇਤਾ ਕਰਨਗੇ।
ਇਸ ਸਮੇਂ ਵੱਡੀ ਗਿਣਤੀ ਵਿੱਚ ਲੋਕਾਂ ਨੇ ਉਨ੍ਹਾਂ ਦਾ ਨਾਹਰਿਆਂ ਦੀ ਗੂੰਜ ਵਿੱਚ ਗੁਰਦੁਆਰਾ ਟੱਕਰ ਸਾਹਿਬ ਮਹਿਲ ਬੁਖ਼ਾਰੀ ਵਿਖੇ ਸੁਆਗਤ ਕੀਤਾ। ਇਸ ਸਮੇਂ ਕਿਸਾਨ ਆਗੂਆਂ ਸਤਨਾਮ ਸਿੰਘ ਝੰਡੇਰ, ਕਲਵੰਤ ਸਿੰਘ ਮੱਲੂਨੰਗਲ, ਹਰਪਾਲ ਸਿੰਘ ਛੀਨਾਂ, ਸਵਿੰਦਰ ਸਿੰਘ ਮੀਰਾਂਕੋਟ, ਸੁਖਦੇਵ ਸਿੰਘ ਸਹਿੰਸਰਾ, ਵਿਜੇਸਾਹ ਧਾਰੀਵਾਲ ਕਲੇਰ, ਹਰਨੇਕ ਸਿੰਘ ਨੇਪਾਲ, ਭੁਪਿੰਦਰ ਸਿੰਘ ਛੀਨਾਂ ਆਦਿ ਹਾਜ਼ਰ ਸਨ।