ਤਲਵਾੜਾ: ਸਬ ਡਵੀਜ਼ਨ ਮੁਕੇਰੀਆਂ ਅਧੀਨ ਆਉਂਦੇ ਸੰਯੁਕਤ ਕਿਸਾਨ ਮੋਰਚੇ ਨੇ ਮੁਕੇਰੀਆਂ ਦੇ ਹੜ੍ਹ ਪ੍ਰਭਾਵਿਤ ਪਿੰਡਾਂ ਦਾ ਦੌਰ੍ਹਾ ਕੀਤਾ। ਹੜ੍ਹ ਨਾਲ ਹੋਏ ਨੁਕਸਾਨ ਦਾ ਜਾਇਜ਼ਾ ਲਿਆ। ਹੜ੍ਹ ਪੀੜਤਾਂ ਨੂੰ ਰਾਹਤ ਸਮੱਗਰੀ ਵੰਡੀ।
ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਇਆਂ ਕਿਸਾਨ ਮੋਰਚੇ ਦੇ ਆਗੂ ਅਮਰਜੀਤ ਕਨੂੰਗੋ, ਲਖਬੀਰ ਸਿੰਘ, ਡਾ ਜਤਿੰਦਰ ਕਾਲੜਾ, ਸਵਰਨ ਸਿੰਘ, ਤਰਲੋਕ ਸਿੰਘ, ਰੋਸ਼ਨ ਖਾਨ, ਧਰਮਿੰਦਰ ਸਿੰਘ ਆਦਿ ਨੇ ਦਸਿਆ ਕਿ ਅੱਜ ਹਲੇੜ੍ਹ, ਜਨਾਰਧਨ, ਮੋਤਲਾ, ਕੁੱਲ੍ਹੀਆਂ, ਕੌਲ਼ੀਆਂ, ਸਿੰਬਲੀ, ਮਹਿਤਾਬਪੁਰ ਆਦਿ ਪਿੰਡਾਂ ਦਾ ਦੌਰ੍ਹਾ ਕੀਤਾ। ਉਨ੍ਹਾਂ ਸਰਕਾਰ ਅਤੇ ਪ੍ਰਸ਼ਾਸਨ ’ਤੇ ਦੋ ਸਾਲ ਪਹਿਲਾਂ ਆਂਏ ਹੜ੍ਹਾਂ ਤੋਂ ਕੋਈ ਸਬਕ ਨਾ ਸਿੱਖਣ ਦੇ ਦੋਸ਼ ਲਗਾਏੇ ਹਨ। ਸਰਕਾਰ ਨੇ ਸਮਾਂ ਰਹਿੰਦਿਆਂ ਨਾ ਤਾਂ ਡੇ੍ਰਨਾਂ ਦੀ ਸਫ਼ਾਈ ਕਰਵਾਈ ਅਤੇ ਨਾ ਹੀ ਧੁੱਸੀ ਬੰਨ੍ਹਾਂ ਨੂੰ ਮਜ਼ਬੂਤ ਕਰਨ ਲਈ ਕੋਈ ਯੋਜਨਾ ਬਣਾਈ। ਪਿੰਡ ਮੋਤਲਾ ਦੇ ਸਾਬਕਾ ਸਰਪੰਚ ਜਗਤਰਾਮ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿੰਡ ਕੋਲ਼ ਬਣਿਆ ਧੁੱਸੀ ਬੰਨ੍ਹ ਐਂਤਕੀ ਫਿਰ ਟੁੱਟ ਗਿਆ ਹੈ। ਪਿੰਡ ਦੀ ਮੁੱਖ ਲਿੰਕ ਸਡ਼ਕ ਹੜ੍ਹ ਦੇ ਪਾਣੀ ’ਚ ਰੁੜ੍ਹ ਗਈ ਹੈ, ਅਤੇ ਉਨ੍ਹਾਂ ਦਾ ਸੜਕੀ ਸੰਪਰਕ ਪਿਛਲੇ ਇੱਕ ਹਫ਼ਤੇ ਤੋਂ ਟੁੱਟਿਆ ਹੋਇਆ ਹੈ। ਝੋਨੇ ਅਤੇ ਗੰਨੇ ਦੀ ਜ਼ਿਆਦਾਤਰ ਫਸਲ ਤਬਾਹ ਹੋ ਗਈ ਹੈ। ਬਾਜਰਾ ਆਦਿ ਨੁਕਸਾਨੇ ਜਾਣ ਕਾਰਨ ਪਸ਼ੂਆਂ ਲਈ ਹਰੇ ਚਾਰੇ ਦੀ ਸਮਸਿਆ ਪੈਦਾ ਹੋ ਗਈ ਹੈ। ਗਰੀਬ ਅਤੇ ਮਜ਼ਦੂਰ ਪਰਿਵਾਰਾਂ ਦੇ ਮਕਾਨ ਜ਼ਿਆਦਾ ਮੀਂਹ ਕਾਰਨ ਚੌਅ ਰਹੇ ਹਨ ਅਤੇ ਕੱਚੇ ਮਕਾਨਾਂ ਦੀਆਂ ਛੱਤਾਂ ਡਿੱਗ ਪਈਆਂ ਹਨ।
ਤਰਸੇਮ ਲਾਲ ਮਹਿਤਾਬਪੁਰ ਨੇ ਦਸਿਆ ਕਿ ਕਿਸਾਨਾਂ ਨੂੰ ਫਸਲ ਤਬਾਹੀ ਦਾ ਗ਼ਮ ਸਤਾ ਰਿਹਾ ਹੈ, ਉੱਥੇ ਹੀ ਹੜ੍ਹ ਕਾਰਨ ਆਏ ਮਲਬੇ ਕਾਰਨ ਖੇਤ ਗਾਰ ਨਾਲ ਭਰ ਗਏ ਹਨ, ਕਿਸਾਨਾਂ ਨੂੰ ਮੁੜ ਖੇਤ ਬਣਾਉਣ ਦੀ ਚਿੰਤਾ ਵੀ ਸਤਾਉਣ ਲੱਗੀ ਹੈ।
ਸੰਯੁਕਤ ਕਿਸਾਨ ਮੋਰਚੇ ਦੇ ਆਗੂਆਂ ਨੇ ਹੜ੍ਹ ਪੀੜਤ ਪਿੰਡਾਂ ਦਾ ਦੌਰ੍ਹਾ ਕਰਨ ਉਪਰੰਤ ਸਰਕਾਰ ਤੋਂ ਬਿਆਸ ਦਰਿਆ ’ਚ ਆਈ ਸਿਲਟ ਨੂੰ ਚੈਨਲਾਈਜ਼ ਕਰਨ, ਪਿੰਡ ਮੋਤਲਾ ਤੋਂ ਧਨੋਆ ਤੱਕ ਜ਼ਮੀਨ ਐਕਵਾਇਰ ਕਰਕੇ ਧੁੱਸੀ ਬੰਨ੍ਹ ਬਣਾਉਣ, ਪ੍ਰਤੀ ਏਕੜ ਇੱਕ ਲੱਖ ਰੁਪਏ ਯਕਮੁਸ਼ਤ ਰਾਹਤ ਦੇਣ, ਡਿੱਗੇ ਮਕਾਨਾਂ ਦੀ ਰਿਪੇਅਰ ਜਾਂ ਨਵੇਂ ਬਣਾਉਣ ਲਈ ਮਦਦ ਅਤੇ ਪ੍ਰਤੀ ਏਕੜ ਮੁਆਵਜ਼ੇ ਦੇ ਸੱਤਵੇਂ ਹਿੱਸੇ ਬਰਾਬਰ ਮਜ਼ਦੂਰ ਪਰਿਵਾਰਾਂ ਨੂੰ ਮੁਆਵਜ਼ਾ ਦੇਣ ਦੀ ਮੰਗ ਕੀਤੀ ਹੈ।
ਮੋਰਚੇ ਨੇ ਹੜ੍ਹ ਪੀੜਤਾਂ ਲਈ ਨਿੱਤਰੀਆਂ ਸਮਾਜਿਕ, ਧਾਰਮਿਕ ਤੇ ਹੋਰ ਸੰਗਠਨਾਂ ਦਾ ਧੰਨਵਾਦ ਕੀਤਾ ਹੈ।
ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਖੜਕ ਸਿੰਘ, ਜਸਵੰਤ ਸਿੰਘ ਅਤੇ ਸ਼ਹੀਦ ਭਗਤ ਸਿੰਘ ਨੌਜਵਾਨ ਸਭਾ, ਪੰਜਾਬ ਦੇ ਵਾਲੰਟੀਅਰਾਂ ਨੇ ਹੜ੍ਹ ਪੀੜਹਤਾਂ ਲਈ ਰਾਹਤ ਸਮੱਗਰੀ ਅਤੇ ਪਸ਼ੂਆਂ ਲਈ ਹਰੇ ਚਾਰੇ ਤੇ ਤੂੜੀ ਦਾ ਪ੍ਰਬੰਧ ਕੀਤਾ।