ਜਲੰਧਰ: ‘ਔਰਤ ਮੁਕਤੀ ਮੋਰਚਾ ਪੰਜਾਬ’ ਵਲੋਂ ਸਥਾਨਕ ਗੀਤਾ ਮੰਦਰ ਵਿਖੇ ਮਰਹੂਮ ਬੀਬੀ ਤ੍ਰਿਪਤਾ ਦੇਵੀ ਗੌਤਮ ਅਤੇ ਰੇਲ ਮੁਲਾਜ਼ਮਾਂ ਦੇ ਉੱਘੇ ਆਗੂ ਸਾਥੀ ਟੀਆਰ ਗੌਤਮ ਦੀ ਯਾਦ ਵਿਚ ‘ਮੌਜੂਦਾ ਰਾਜਸੀ ਹਾਲਾਤ ਤੇ ਔਰਤਾਂ ਸਨਮੁਖ ਕਾਰਜ’ ਵਿਸ਼ੇ ਦਾ ਭਰਵਾਂ ਸੂਬਾਈ ਸੈਮੀਨਾਰ ਆਯੋਜਿਤ ਕੀਤਾ ਗਿਆ। ਗਦਰੀ ਬੀਬੀ ਗੁਲਾਬ ਕੌਰ ਦੇ ਵਿਛੋੜੇ ਦੀ ਸ਼ਤਾਬਦੀ ਨੂੰ ਸਮਰਪਿਤ ਇਸ ਸੈਮੀਨਾਰ ਦੀ ਪ੍ਰਧਾਨਗੀ ਸ਼੍ਰੀਮਤੀ ਅਰੁਣਾ ਸ਼ਰਮਾ, ਮੀਨਾਕਸ਼ੀ ਭਾਰਦਵਾਜ, ਅਜੀਤ ਕੌਰ ਅਜਨਾਲਾ ਨੇ ਕੀਤੀ। ਮੰਚ ’ਤੇ ਜਸਵੀਰ ਕੌਰ, ਹਰਿੰਦਰ ਕੌਰ, ਮਮਤਾ, ਕੁਲਵਿੰਦਰ ਕੌਰ, ਡਾ. ਰਘਬੀਰ ਕੌਰ, ਡਾ ਲੇਜ਼ੀਆ, ਲਖਵੀਰ ਕੌਰ, ਕਾਮਰੇਡ ਸ਼ਿਵ ਕੁਮਾਰ, ਕਾਮਰੇਡ ਮੰਗਤ ਰਾਮ ਪਾਸਲਾ ਵੀ ਬਿਰਾਜਮਾਨ ਸਨ।
ਕੇਂਦਰੀ ਯੂਨੀਵਰਸਿਟੀ ਪੰਜਾਬ ਵਿਖੇ ਪੰਜਾਬੀ ਵਿਭਾਗ ਦੇ ਸਹਾਇਕ ਪ੍ਰੋਫੈਸਰ ਡਾਕਟਰ ਲਖਵੀਰ ਕੌਰ ਨੇ ਕੂੰਜੀਵਤ ਪਰਚਾ ਪੜ੍ਹਿਆ। ਵਿਦਵਾਨ ਬੁਲਾਰੇ ਨੇ ਇਤਿਹਾਸਕ ਤੱਥਾਂ ਦੇ ਹਵਾਲੇ ਨਾਲ ਸਿੱਧ ਕੀਤਾ ਕਿ ਬਹੁ ਗਿਣਤੀ ਦੇ ਜਜਬਾਤ ਭੜਕਾ ਕੇ ਕੀਤੀ ਜਾਂਦੀ ਫਿਰਕੂ ਸਿਆਸਤ ਤੇ ਕਤਾਰਬੰਦੀ, ਹਰ ਕਿਸਮ ਦਾ ਕੱਟੜਵਾਦ ਅਤੇ ਪਿੱਤਰਸੱਤਾਵਾਦੀ ਵਿਚਾਰ ਚੌਖਟਾ ਨਾ ਕੇਵਲ ਇਸਤਰੀਆਂ ਦੇ ਸਵੈਮਾਨ ਤੇ ਆਜਾਦੀ ਨੂੰ ਘੱਟੇ ਰੋਲਦੇ ਬਲਕਿ ਸਮਾਨ ਅਧਿਕਾਰਾਂ ਦੀ ਪ੍ਰਾਪਤੀ ਦੇ ਔਰਤਾਂ ਦੇ ਮਾਨਵੀ ਸੰਘਰਸ਼ਾਂ ਦੇ ਰਾਹ ਦਾ ਸਭ ਤੋਂ ਵੱਡਾ ਅੜਿੱਕਾ ਵੀ ਹਨ। ਉਨ੍ਹਾਂ ਜੋਰ ਦਿੰਦਿਆਂ ਕਿਹਾ ਕਿ ਇਸਤਰੀਆਂ ਦੀ ਫੈਸਲਾਕੁੰਨ ਸ਼ਮੂਲੀਅਤ ਤੋਂ ਬਿਨਾਂ ਜਮਹੂਰੀ ਲਹਿਰ ਅਤੇ ਜਮਹੂਰੀ ਲਹਿਰ ਨਾ ਸਹਿ ਪਰਿਪੇਖ ਵਿਚ ਅਗਾਂਹ ਵਧ ਸਕਦੇ ਹਨ ਅਤੇ ਨਾ ਹੀ ਸਮਾਜਿਕ ਤਬਦੀਲੀ ਦਾ ਆਧਾਰ ਬਣਨ ਵਾਲੀਆਂ ਜਿੱਤਾਂ ਹਾਸਲ ਕਰ ਸਕਦੇ ਹਨ।
ਡਾਕਟਰ ਲਖਵੀਰ ਕੌਰ ਨੇ ਕਿਹਾ ਕਿ ਔਰਤਾਂ ਦੀਆਂ ਸੰਵੇਦਨਾਵਾਂ ਦਾ ਨਿਰਾਦਰ ਤੇ ਉਨ੍ਹਾਂ ਦੀ ਬੌਧਿਕ ਸਮਰੱਥਾ ਦੀ ਅਣਦੇਖੀ ਕਰਨ ਵਾਲਾ ਸਮਾਜ ਕਦੀ ਵੀ ਠੀਕ ਲੀਹਾਂ ‘ਤੇ ਤਰੱਕੀ ਨਹੀਂ ਕਰ ਸਕਦਾ। ਜਿਥੇ ਮਰਦਾਂ ਨੂੰ ਹਰ ਖੇਤਰ ‘ਚ ਔਰਤਾਂ ਨੂੰ ਬਰਾਬਰ ਹੱਕ ਦੇਣ ਦੇ ਮੁਦੱਈ ਬਣਨਾ ਚਾਹੀਦਾ ਹੈ ਉੱਥੇ ਨਾਲ ਹੀ ਔਰਤਾਂ ਨੂੰ ਮਰਦ ਵਿਰੋਧੀ ਸੋਚ ਤਿਆਗ ਕੇ ਆਪਣੇ ਘੋਲਾਂ ਨੂੰ ਲੋਟੂ ਢਾਂਚੇ ਤੋਂ ਮੁਕਤੀ ਦਾ ਸਾਧਨ ਬਣਾਉਣਾ ਚਾਹੀਦਾ ਹੈ।
ਨਾਮਵਰ ਬੁੱਧੀਜੀਵੀ ਡਾਕਟਰ ਰਘਬੀਰ ਕੌਰ ਨੇ ਗਦਰੀ ਸੰਗਰਾਮਣ ਗੁਲਾਬ ਕੌਰ ਦੇ ਮਿਸਾਲੀ ਜੀਵਨ ਅਤੇ ਪ੍ਰੇਰਣਾਦਾਇਕ ਘਾਲਣਾਵਾਂ ਬਾਰੇ ਚਾਨਣਾ ਪਾਇਆ।
ਦੇਸ਼ ਦੀ ਜਮਹੂਰੀ ਲਹਿਰ ਦੇ ਸਿਰਮੌਰ ਆਗੂ ਸਾਥੀ ਮੰਗਤ ਰਾਮ ਪਾਸਲਾ ਨੇ ਕਿਹਾ ਕਿ ਕਿਸੇ ਵੀ ਦੇਸ਼ ‘ਚ ਮਾਸੂਮਾਂ ਦਾ ਵਢਾਂਗਾ ਕਰਕੇ ਕਾਇਮ ਕੀਤਾ ਗਿਆ ਧਰਮ ਅਧਾਰਤ ਪਿਛਾਖੜੀ ਰਾਜ ਅੰਤ ਨੂੰ ਸਬੰਧਤ ਦੇਸ਼ ਦੀ ਹਰ ਧਰਮ ਨੂੰ ਮੰਨਣ ਵਾਲੀ ਸਮੁੱਚੀ ਕਿਰਤੀ ਵਸੋਂ ਦੇ ਬੇਤਰਸ ਲੁੱਟ-ਖਸੁੱਟ ਤੇ ਵਸੋਂ ‘ਤੇ ਅਣਕਿਆਸੇ ਜਬਰ-ਜੁਲਮ ਢਾਹੇ ਜਾਣ ਦਾ ਜਰੀਰਾ ਬਣਦਾ ਹੈ। ਉਨ੍ਹਾਂ ਕਿਹਾ ਕਿ ਨਵ-ਉਦਾਰਵਾਦੀ ਨੀਤੀਆਂ ਲਾਗੂ ਹੋਣ ਨਾਲ ਔਰਤਾਂ ਦੀ ਲੁੱਟ-ਚੋਂਘ ਅਤੇ ਗੁਲਾਮੀ ‘ਚ ਅੰਤਾਂ ਦਾ ਵਾਧਾ ਹੋਇਆ ਹੈ।
ਅੰਤ ‘ਚ ‘ਮੋਰਚੇ‘ ਦੀ ਸੂਬਾ ਪ੍ਰਧਾਨ ਪ੍ਰੋ ਸੁਰਿੰਦਰ ਕੌਰ ਨੇ ਸਭਨਾਂ ਦਾ ਧੰਨਵਾਦ ਕੀਤਾ।
ਇਸ ਮੌਕੇ ਜਤਿੰਦਰ ਕੌਰ ਸੰਧੂ, ਬਲਜਿੰਦਰ ਕੌਰ, ਗੁਰਿੰਦਰ ਕੌਰ, ਲਖਵਿੰਦਰ ਜਾਮਾਰਾਏ, ਅਜੀਤ ਕੌਰ ਤੁੜ ਵੀ ਮੌਜੂਦ ਸਨ।