ਅਜਨਾਲਾ: ਜਮਹੂਰੀ ਕਿਸਾਨ ਸਭਾ ਦੀ ਟੀਮ ਨੇ ਕੁੱਝ ਪਿੰਡਾਂ ’ਚ ਖੇਤੀ ਵਿੱਚ ਕੰਮ ਕਰਦੇ ਕਿਸਾਨਾਂ ਨਾਲ ਸੰਪਰਕ ਕਰਦੇ ਹੋਏ ਸੁਨੇਹਾ ਦਿੱਤਾ ਕਿ ਝੋਨੇ ਦੀ ਪਰਾਲੀ ਨੂੰ ਅੱਗ ਨਹੀਂ ਲਾਉਣੀ ਚਾਹੀਦੀ, ਅਜਿਹਾ ਕਰਨ ਨਾਲ ਜੈਵਿਕ ਮਾਦਾ ਮਰ ਜਾਂਦਾ ਹੈ, ਜਿਸ ਨਾਲ ਜ਼ਮੀਨ ਦੀ ਉਪਜਾਊ ਸ਼ਕਤੀ ਘੱਟਦੀ ਹੈ। ਬਹੁਤ ਸਾਰੇ ਕਿਸਾਨਾਂ ਦੇ ਮਿੱਤਰ ਕੀੜੇ ਮਕੌੜੇ ਜੀਵ ਜੰਤੂ ਖਾਸ ਕਰ ਗੰਡੋਏ ਵੀ ਮਰ ਜਾਦੇ ਹਨ, ਜਿਹੜੇ ਜ਼ਮੀਨ ਦੀ ਉਪਜਾਊ ਸ਼ਕਤੀ ਵਧਾਉਣ ਵਾਲੇ ਹੁੰਦੇ ਹਨ।
ਖੇਤੀ ਵਿਗਿਆਨੀ ਤੇ ਜਮਹੂਰੀ ਕਿਸਾਨ ਸਭਾ ਦੇ ਪ੍ਰਧਾਨ ਡਾ. ਸਤਨਾਮ ਸਿੰਘ ਅਜਨਾਲਾ ਨੇ ਪਿੰਡ ਕੜਿਆਲ ਤੇ ਸੁਖਵੰਤ ਸਿੰਘ ਦੇ ਖੇਤ ਵਿੱਚ ਆਪ ਖਲੋਕੇ ਦੱਸਿਆ ਕਿ ਕਿਸਾਨਾਂ ਨੂੰ ਝੋਨੇ ਦੀ ਪਰਾਲੀ ਨੂੰ ਅੱਗ ਲਾਉਣ ਦੀ ਬਜਾਏ ਤਵੀਆਂ ਜਾਂ ਸੁਪਰਸੀਡਰ ਨਾਲ ਪਰਾਲੀ ਨੂੰ ਜ਼ਮੀਨ ਵਿੱਚ ਵਾਹ ਦੇਣਾ ਚਾਹੀਦਾ ਹੈ ਜਾਂ ਮਲਚਰ ਨਾਲ ਰਲ ਦੇਣਾ ਚਾਹੀਦਾ ਹੈ ਅਤੇ ਜੇਕਰ ਅਜਿਹਾ ਨਾ ਕਰ ਸਕੋ ਤਾਂ ਉਲਟਾਵੀ ਹੱਲ ਨਾਲ ਵਾਹਕੇ ਪਰਾਲੀ ਨੱਪੀ ਜਾ ਸਕਦੀ ਹੈ, ਅਜਿਹਾ ਕਰਨ ਨਾਲ ਵੀ ਜੈਵਿਕ ਮਾਦਾ ਵਧਦਾ ਹੈ ਅਤੇ ਕਣਕ ਬੀਜਣ ਲਈ ਯੂਰੀਆ ਖਾਦ ਵੀ ਘੱਟ ਪਾਉਣੀ ਪੈਂਦੀ ਹੈ।
ਕਿਸਾਨਾਂ ਨੇ ਚੰਗਾ ਹੁੰਗਾਰਾ ਭਰਦਿਆਂ ਕਿਹਾ ਕਿ ਉਹ ਅਜਿਹਾ ਹੀ ਕਰਨਗੇ। ਡਾ. ਅਜਨਾਲਾ ਨੇ ਅੱਗੇ ਦੱਸਿਆ ਕਿ ਪਰਾਲੀ ਨੂੰ ਜ਼ਮੀਨ ਦੋਜ਼ ਕਰਨ ਨਾਲ ਜੇਕਰ ਕਣਕ ਦੀ ਬਿਜਾਈ ਤੋਂ ਲੈਕੇ ਵਢਾਈ ਤੱਕ ਵਿਗਿਆਨਕ ਤਰੀਕੇ ਨਾਲ ਕਣਕ ਦੀ ਖੇਤੀ ਕਰਨ ਨਾਲ ਸਹਿਜੇ ਹੀ 26 ਤੋਂ 29 ਕੁਇੰਟਲ ਤੱਕ ਕਣਕ ਦਾ ਝਾੜ ਨਿਕਲੇਗਾ। ਖੇਤੀ ਮਾਹਿਰ ਅਜਨਾਲਾ ਨੇ ਭਗਵੰਤ ਮਾਨ ਦੀ ਸਰਕਾਰ ਵਲੋਂ ਜਿਹੜੇ ਪਰਾਲੀ ਸਾੜਨ ਦੇ ਮੁਕੱਦਮੇ ਤੇ ਜੁਰਮਾਨੇ ਕੀਤੇ ਜਾ ਰਹੇ ਹਨ ਉਹ ਤੁਰੰਤ ਕਿਸਾਨ ਹਿੱਤ ਵਿੱਚ ਬੰਦ ਕੀਤੇ ਜਾਣ ਅਤੇ ਪਹਿਲਾਂ ਕੀਤੇ ਅਜਿਹੇ ਮੁਕੱਦਮੇ ਵਾਪਸ ਲੈ ਜਾਣ। ਅਜਿਹਾ ਕਰਨ ਦੀ ਬਜਾਏ ਪੰਜਾਬ ਸਰਕਾਰ ਵੱਲੋਂ ਖੇਤੀਬਾੜੀ ਵਿਭਾਗ ਨੂੰ ਅਜਿਹੇ ਲੋੜੀਂਦੇ ਸੰਦ ਪਰਾਲੀ ਨੂੰ ਜ਼ਮੀਨ ਵਿੱਚ ਵਾਹੁਣ ਆਦਿ ਲਈ ਕਿਸਾਨਾਂ ਨੂੰ ਸਸਤੇ ਤੋਂ ਸਸਤੇ ਦਰਾਂ ਤੇ ਉਪਲੱਬਧ ਕਰਾਏ ਜਾਣ।ਜੇਕਰ ਸਰਕਾਰ ਨੇ ਅਜਿਹਾ ਨਾ ਕੀਤਾ ਤਾਂ ਸੰਯੁਕਤ ਕਿਸਾਨ ਮੋਰਚੇ ਵੱਲੋਂ ਸਖ਼ਤ ਕਦਮ ਚੁੱਕੇ ਜਾਣਗੇ। ਇਸ ਸਮੇਂ ਨੌਜਵਾਨ ਕਿਸਾਨ ਯੁਵਰਾਜ ਸਿੰਘ, ਜੋਬਨ ਸਿੰਘ, ਕਿਸਾਨ ਆਗੂ ਹਰਨੇਕ ਸਿੰਘ ਨੇਪਾਲ, ਸੋਨੂੰ ਕੜਿਆਲ ਆਦਿ ਇਸ ਸਮੇਂ ਖੇਤ ਵਿੱਚ ਹਾਜ਼ਰ ਸਨ।