ਫਿਲੌਰ: ਸਾਥੀ ਸੋਹਣ ਲਾਲ ਕੰਗ ਜਗੀਰ ਦਾ ਸੇਜਲ ਅੱਖਾਂ ਨਾਲ ਅੰਤਿਮ ਸਸਕਾਰ ਕਰ ਦਿੱਤਾ ਗਿਆ। ਉਹ ਕਰੀਬ 68 ਵਰ੍ਹਿਆਂ ਦੇ ਸਨ। ਸਾਥੀ ਸੋਹਣ ਲਾਲ ਦੁਕਾਨਦਾਰ ਹੋਣ ਦੇ ਨਾਲ ਨਾਲ ਦਿਹਾਤੀ ਮਜ਼ਦੂਰ ਸਭਾ ‘ਚ ਸਰਗਰਮ ਸਨ। ਜਵਾਨੀ ਵੇਲੇ ਉਹ ਲਗਾਤਾਰ ਨੌਜਵਾਨ ਸਭਾ ‘ਚ ਸਰਗਰਮ ਰੋਲ ਅਦਾ ਕਰਦੇ ਰਹੇ। 2000 ਸੰਨ ਦੌਰਾਨ ਉਹ ਵਿਚਾਰਧਾਰਕ ਘੋਲ ਵੇਲੇ ਸੀਪੀਐੱਮ ਪੰਜਾਬ ਅਤੇ ਮਗਰੋਂ ਆਰਐੱਮਪੀਆਈ ਦੇ ਸਰਗਰਮ ਕਾਰਕੁਨ ਰਹੇ। ਉਹ ਕੁੱਝ ਕੁ ਮਹੀਨਿਆਂ ਤੋਂ ਬਿਮਾਰ ਸਨ। ਪਰਸੋਂ ਉਹ ਸਦਾ ਲਈ ਵਿਛੋੜਾ ਦੇ ਗਏ।
ਅੱਜ ਉਨ੍ਹਾ ਦੇ ਜੱਦੀ ਪਿੰਡ ਧਾਰਮਿਕ ਰਸਮਾਂ ਦੌਰਾਨ ਸਸਕਾਰ ਕਰ ਦਿੱਤਾ ਗਿਆ। ਇਸ ਮੌਕੇ ਸੂਹਾ ਝੰਡਾ ਪਾ ਕੇ ਉਨ੍ਹਾ ਨੂੰ ਅੰਤਿਮ ਵਿਦਾਇਗੀ ਦਿੱਤੀ ਗਈ। ਵਿਦਾਇਗੀ ਦੇਣ ਮੌਕੇ ਪਾਰਟੀ ਦੇ ਸੂਬਾ ਕਮੇਟੀ ਮੈਂਬਰ ਡਾ. ਸਰਬਜੀਤ ਮੁਠੱਡਾ, ਦਿਹਾਤੀ ਮਜ਼ਦੂਰ ਸਭਾ ਦੇ ਜ਼ਿਲ੍ਹਾ ਸਕੱਤਰ ਪਰਮਜੀਤ ਰੰਧਾਵਾ, ਜਮਹੂਰੀ ਕਿਸਾਨ ਸਭਾ ਦੇ ਜ਼ਿਲ੍ਹਾ ਸਕੱਤਰ ਸੰਤੋਖ ਸਿੰਘ ਬਿਲਗਾ, ਤਹਿਸੀਲ ਪ੍ਰਧਾਨ ਕੁਲਦੀਪ ਫਿਲੌਰ, ਬਨਾਰਸੀ ਦਾਸ ਘੁੜਕਾ, ਮਨਰੇਗਾ ਵਰਕਰਜ਼ ਯੂਨੀਅਨ ਦੇ ਸੂਬਾ ਆਗੂ ਮੇਜਰ ਫਿਲੌਰ, ਕੁਲਜੀਤ ਫਿਲੌਰ, ਮਨਜੀਤ ਸੂਰਜਾ, ਮੱਖਣ ਸੰਗਰਾਮੀ, ਦਵਿੰਦਰ ਨਗਰ ਆਦਿ ਹਾਜ਼ਰ ਸਨ।
ਆਪਣੇ ਵਿਛੜੇ ਆਗੂ ਨੂੰ ਅਲਵਿਦਾ ਕਹਿਣ ਵਾਸਤੇ ਉਕਤ ਆਗੂਆਂ ਤੋਂ ਬਿਨ੍ਹਾਂ ਵੱਡੀ ਗਿਣਤੀ ‘ਚ ਰਿਸ਼ਤੇਦਾਰ, ਦੋਸਤ ਮਿੱਤਰ ਪਰਿਵਾਰ ਦੇ ਗਮ ‘ਚ ਸ਼ਰੀਕ ਹੋਣ ਵਾਸਤੇ ਪੁੱਜੇ ਹੋਏ ਸਨ।
ਸਾਥੀ ਸੋਹਣ ਲਾਲ ਨਮਿੱਤ ਕਿਰਿਆ 28 ਅਕਤੂਬਰ ਨੂੰ ਹੋਵੇਗੀ।